ЈАГУЛА

Јагула на струшки начин

Како Струга - нема друга. Во Струга на релативно мал простор е остварен вонвременски спој на природните убавини и културното населедство кои впечатливо ја илустрираат историјата.
Спој кој ја изградил физиономијата на ловците на јагули од неолитот до ден денешен.

Јагулата од Охридското езеро е заштитен вид и нејзиниот лов е забранет.

Да ги поддржиме напорите за сочувување на Охридските јагули и овој специјалитет да го подготвуваме исклучиво со јагули од рибник.

Подготовка Тешка 180 мин. 4 лица

Два килограми јагула се закачува на ченгел, се дере кожата со весник, се чисти внатрешноста, се чисти главата бидејќи е отровна и се посолува.
Следен чекор е обезмастувањето на јагулата. Таа само посолена и хоризонтално засечена на неколку места, се става во загреана рерна на 200°C десетина минути. Се цеди маснотијата која ја пушта јагулата и оваа постапка се повторува три пати.
Следен чекор е филувањето. Јагулата во земјена тава се става во круг а во средината две китки македон (струшки израз – магдонос) со малку сол. Цели чешниња лук се редат во засечените делови на јагулата. Одоѕгора (исто струшки дијалект) се потура со 2 дл винска киселина растворена со 1 дл вода за да ја убие маснотијата, како и два цедени лимони.
Се пече во загреана рерна на 170°C додека одоѕгора не добие кора и да испари водатa.

Потребни состојки:

2 кг јагула

2 китки магдонос

5 чешниња лук

2 дл винска киселина

1 дл вода

2 лимона